პოლონეთის ხელისუფლების გადაწყვეტილებით, 2015 წელს დაგეგმილი, პოლონეთში რუსეთის წლის და რუსეთში პოლონეთის წლის აღსანიშნავი ღონისძიებები გაუქმდა. უცხოური მედიის ინფორმაციით, პოლონეთმა ეს გადაწყვეტილება უკრაინის მოვლენების და "ბოინგ 777"-ის კატასტროფის გამო მიიღო.

როგორც პოლონეთის მინისტრთა კაბინეტის პრესსამსახურში განაცხადეს, საგარეო საქმეთა მინისტრმა რადოსლავ სიკორსკიმ და კულტურის მინისტრმა მალგოჟატა ომილანოვსკამ ჩათვალეს, რომ შეუძლებელია ამ ღონისძიებების აღნიშვნა, "გამომდინარე არსებული პოლიტიკური ვითარებიდან და ყველაფერ იმის გათვალისწინებით, რაც უკრაინაში ხდება".

რუსეთი და პოლონეთი აღნიშნული ღონისძიებების ჩატარებაზე 2013 წლის ბოლოს შეთანხმდნენ.

პოლონეთის ამ გადაწყვეტილებას უკვე გამოეხმაურნენ რუსეთის საგარეო საქმეთა სამინისტროში. როგორც საგარეო უწყების სპეციალური წარმომადგენელი, ალექსანდრე ლუკაშევიჩი აცხადებს, მოსკოვს ჯერ არ მიუღია პოლონეთისგან ღონისძიებების გაუქმების შესახებ ოფიციალური შეტყობინება. ლუკაშევიჩის განცხადებით, პოლონეთში რუსეთის წლის, ხოლო რუსეთში პოლონეთის წლის აღნიშვნა რუსი და პოლონელი ხალხის დაახლოებას, ასევე ორმხრივი ურთიერთობების გაუმჯობესებას ისახავდა მიზნად.

"თუ პოლონეთის მთავრობამ ასეთი ნეგატიური არჩევანი გააკეთა, აქ ზედმეტი კომენტარები, როგორც იტყვიან, უადგილოა", -განაცხადა ლუკაშევიჩმა.

მისივე თქმით, რუსეთი კვლავინდებურად მნიშვნელოვნად მიიჩნევს პოლონეთსა და რუსეთს შორის კულტურულ-ჰუმანიტარული ურთიერთობების გაღრმავებას.