ხელისუფლება დღეს ვერ აირიდებს პასუხისმგებლობას მხოლოდ და მხოლოდ მეისრეების შემოთავაზებით, – ამის შესახებ "თავისუფალი დემოკრატების" წარმომადგენელმა ალექსი პეტრიაშვილმა ალექსანდრე ჭიკაიძის მიერ შინაგან საქმეთა მინისტრის პოსტიდან გადადგომის საკითხის კომენტირებისას განაცხადა.

ალექსი პეტრიაშვილის შეფასებით, ეს იყო ალექსანდრე ჭიკაიძის მხრიდან სწორი გადაწყვეტილება. "მე დარწმუნებული ვარ, რომ ლექსო ჭიკაიძე დამოუკიდებლად არ არის იმ გადაწყვეტილების მიმღები და იმ ძალის გავლენის მქონე ფიგურა, რომელსაც ეულად ხელეწიფებოდა კონკრეტული პიროვნებების დაფარვა ან მფარველობა და ა.შ. აქ საქმე უფრო სერიოზულ პრობლემებთან გვაქვს. ყველამ იცის და აღიარებულია, რომ პროკურატურის საქმიანობა ვერანაირ კრიტიკას ვერ უძლებს. გაჭიანურდა ისეთი უმნიშვნელოვანესი საქმეების გამოძიებაც კი, როგორიც არის 2006 წლის ე.წ. სპეცოპერაცია, რომლის შემდგომაც დაიღუპა ზურაბ ვაზაგაშვილი, ჭიანურდება ძალიან ბევრი სხვა საქმეებიც. მაშინ, როდესაც რეალურად ძალიან "სწრაფად და ობიექტურად" სრულდება პოლიტიკური დაკვეთები, მე ვგულისხმობ ამ შემთხვევაში ე.წ. კაბელების საქმეს. ამიტომ ჩვენ მოვითხოვთ და აუცილებლად დადგება პროკურატურის უმაღლესი თანამდებობის პირების პასუხისმგებლობის საკითხი, რომელთაც არანაკლები პასუხისმგებლობა ეკისრებათ", - აღნიშნა ალექსი პეტრიაშვილმა.

მისივე თქმით, ასევე გამოსაძიებელია ხელისუფლების უმაღლესი ეშელონების ჩართულობა, თანამონაწილეობა, პასიურობა თუ უპასუხისმგებლობა კონკრეტულად ვაზაგაშვილების საქმესთან მიმართებაში.

როგორც ალექსი პეტრიაშვილმა განაცხადა, ხაზგასმით უნდა აღინიშნოს, რომ ჭიკაიძე მინისტრთა კაბინეტში სუბორდინაციას დაქვემდებარებული მინისტრი იყო. "მხოლოდ მისი გადაწყვეტილებით, ექსკლუზიურად ვერავის დაფარვა ვერ მოხდებოდა, ამიტომ საჭიროა, აუცილებელია შემდგომი მოკვლევა და გამოძიება. რამდენადაც ჩემთვის ცნობილია, ამაზე ტრაგიკულად დაღუპული იური ვაზაგაშვილი თავის ბოლო განცხადებებში საუბრობდა. თუკი ასეთი პიროვნებები ჯერ კიდევ არიან დასაქმებული, არის არა მხოლოდ შინაგან საქმეთა მინისტრის, არამედ, მთავრობის ხელმძღვანელის და მთლიანად ხელისუფლების პასუხისმგებლობა", - აღნიშნა ალექსი პეტრიაშვილმა.