საქართველოს სავაჭრო-სამრეწველო პალატის აკადემიის ორგანიზებით მასტერ კლასის ტიპის შეხვედრა გაიმართება. შეხვედრის თემაა "საქონლის პრეფერენციული (შეღავათიანი) და არაპრეფერენციული წარმოშობის სერტიფიკატები და მათი გავლენა საბაჟო გადასახდელებზე".

როგორც "ინტერპრესნიუსს" საქართველოს სავაჭრო-სამრეწველო პალატიდან აცნობეს, ღონისძიება 21 თებერვალს, 13:00 საათზე მოეწყობა. შეხვედრის სპიკერი იქნება ფინანსთა სამინისტროს შემოსავლების სამსახურის მომსახურების დეპარტამენტის წარმომადგენელი (საბაჟო კანონმდებლობის ტრეინერ-ექსპერტი) თინათინ მჭედლიშვილი.

საქართველოს სავაჭრო-სამრეწველო პალატის აკადემიის ინფორმაციით, შეხვედრის ფარგლებში ექსპერტის მიერ განიხილება პრეფერენციული (შეღავათიანი) და არაპრეფერენციული წარმოშობის სერტიფიკატების სახეები; საქონლის წარმოშობის ქვეყნის განსაზღვრის მნიშვნელობა საქართველოს საბაჟო ტერიტორიაზე საქონლის შემოტანისას ან/და საქართველოს საბაჟო ტერიტორიიდან საქონლის გატანისას; სერტიფიკატების სტანდარტები და მისი მიღების გზები. სერტიფიკატების შეღავათიანი და კომერციული მიზნებისათვის გამოყენება საბაჟო გაფორმების პროცესში.

მასტერ კლასზე დასწრების შედეგად მონაწილეს საშუალება ექნება დარგის წამყვანი პრაქტიკოსი ექსპერტისაგან მიიღოს სრულფასოვანი ცოდნა და რეკომენდაციები თუ როგორ ისარგებლოს საერთაშორისო ხელშეკრულებებით და კონვენციებით შეთავაზებული და მოქმედი კანონმდებლობით გათვალისწინებული შეღავათებით, რაც მნიშვნელოვნად აისახება კომპანიის ფინანსურ მდგომარეობაზე და შეამცირებს პირის მიმართ წარმოშობილ ფინანსურ საგადასახადო ვალდებულებს.

შეხვედრის მეორე ნაწილში გაიმართება პანელის ტიპის შეხვედრა, რომლის დროსაც მონაწილეებს ინტერაქტიურ რეჟიმში საშუალება ექნებათ დასვან კითხვები თემასთან დაკავშირებული საკითხების ირგვლივ; მიიღონ კომპეტენტური პასუხები და რეკომენდაციები დარგის ექსპერტისაგან.

დაინტერესების შემთხვევაში რეგისტრაცია შესაძლებელია ქვემოთ მოცემულ ლინკზე: http://academy.gcci.ge/