ბორის ნემცოვის მკვლელობის მთავარი თვითმხილველი, ანნა დურიცკაია პოლიგრაფის (ე.წ. სიცრუის დეტექტორის) მეშვეობით დაკითხვაზე უარს აცხადებს. ამის შესახებ გამოცემა "ინტერფაქსს" უკრაინელი გოგონას ადვოკატმა ვადიმ პროხოროვმა განუცხადა.

"ჩვენი პოზიცია ასეთია: პოლიგრაფით დაკითხვით ისინი ახალი სამხილების გამოვლენას არ ცდილობენ, მათ სურთ დაადგინონ ილაპარაკა თუ არა დურიცკაიამ სიმართლე. მის სიმართლეში კი არავის ეპარება ეჭვი. ამიტომაც ჩვენ პოლიგრაფით დაკითხვაზე უარს ვაცხადებთ. ის ახლა მძიმე ფსიქოლოგიურ მდგომარეობაში იმყოფება, პოლიგრაფით დაკითხვა კი მისთვის დამატებითი სტრესი იქნება", - განაცხადა ადვოკატმა, ვადიმ პროხოროვმა.

ბორის ნემცოვი მოსკოვის ცენტრში 27 თებერვალს, გვიან ღამით მოკლეს. რუს ოპოზიციონერს 3 მარტს, მოსკოვში, ტროეკუროვსკოეს სასაფლაოზე დაკრძალავენ.