იაპონიაში 2011 წელს ძლიერი მიწისძვრისა და ცუნამის შედეგად დაღუპულებს იხსენებენ. "ბიბისის" ცნობით, ტოკიოში მემორიალური ღონისძიება უკვე გაიმართა, მას იმპერატორი აკიჰიტო და პრემიერ-მინისტრი შინძო აბე დაესწრნენ. დაღუპულთა პატივსაცემად ღონისძიებები ქვეყნის სხვა ქალაქებშიც გაიმართა.

იაპონიაში ძლიერი მიწისძვრა 4 წლის წინ 11 მარტს მოხდა, რასაც ცუნამი მოჰყვა. სტიქიის შედეგად 16 000 ადამიანი დაიღუპა. დაახლოებით 2000 ადამიანი კი ამ დრომდე დაკარგულად ითვლება. ძლიერი ცუნამის გამო ატომურ ელექტროსადგურ "ფუკუშიმა 1"-ზე ავარია მოხდა, რის გამოც რადიაციის გავრცელების საფრთხე გაჩნდა. "ფუკუშიმა 1"-ზე მომხდარი ავარია 1986 წლის ჩერნობილის კატასტროფის შემდეგ ყველაზე მასშტაბური და ადამიანის სიცოცხლისთვის საფრთხის შემცველი ინციდენტი იყო.