"ბიბლუსი გალერეაში" პროექტ "ლიბერთინსის" ფარგლებში გამოცემული მესამე წიგნი, მსოფლიო ბესტსელერი ჰოლი სმეილის "გიკი გოგო" 10 ლარის ნაცვლად მხოლოდ 3 ლარად გაიყიდა. ჰოლი სმეილის "გიკი გოგო" 15 წლის ჰარიეტ მანერსის თავგადასავლის შესახებ მოგვითხრობს.

აქცია თბილისში, ჭავჭავაძის #7-ში მდებარე "ბიბლუსი გალერეაში" გუშინ 19.00 საათზე დაიწყო. ის ერთი საათით იყო დაგეგმილი. თუმცა წიგნის შეძენის მსურველთა დიდი რაოდენობის გამო, ორგანიზატორებმა აქცია იქამდე გააგრძელეს, ვიდრე წიგნი აქციაზე მყოფმა ყველა მსურველმა არ შეიძინა.

როგორც "ბიბლუსი გალერეაში" შეკრებილი საზოგადოება აცხადებდა, მოხარული არიან იმით, რომ წიგნი ქართულად ითარგმნა და მისი შეძენა ხელსაყრელ ფასში არის შესაძლებელი.

როგორც "ინტერპრესნიუსთან" საუბრისას გამომცემლობა "პალიტრა L"-ის პროექტების მენეჯერმა თინათინ ფეიქრიშვილმა განაცხადა, იმავე წიგნზე მსგავსი აქცია რამდენიმე დღის წინ გაიმართა ქუთაისში და საკმაოდ წარმატებული იყო. "დღეს "ლიბერთინსის" პროექტის ფარგლებში მესამე წიგნზე მიმდინარეობს აქცია თბილისში. ეს წიგნი არის ჰოლი სმეილის "გიკი გოგო". მოხარულები ვართ, რომ ასობით თინეიჯერი დგას რიგში და ელოდება წიგნის შეძენას. ჩვენ მსგავსი აქცია ჩავატარეთ ქუთაისში, რომელმაც წარმატებით ჩაიარა და მოხარულები ვართ, რომ რეგიონები აქტიურად არიან ჩართულები მსგავს პროექტებში", - აღნიშნა ფეიქრიშვილმა.

მისივე თქმით, მორიგი აქცია იგეგმება აპრილის დასაწყისში და ეს შეეხება ჯეიმზ დაშნერის წიგნის "ლაბირინთში მორბენალის" მეორე ტომს, "ცეცხლით გამოცდას".