ყოფილი მე-8 საავადმყოფოს ბაზაზე, დღეს მრავალპროფილიანი საუნივერსიტეტო კლინიკა გაიხსნება.

როგორც "ინტერპრესნიუსს" საქართველოს მთავრობის ადმინისტრაციიდან აცნობეს, კლინიკა გათვლილია 185 საწოლზე და აღჭურვილია თანამედროვე ლაბორატორიით, რადიოლოგიური დიაგნოსტიკისა და მაღალტექნოლოგიური სამედიცინო კვლევებისათვის საჭირო აპარატურით.

საუნივერსიტეტო კლინიკაში მზადებას გაივლის და პრაქტიკულ უნარ-ჩვევებს დაეუფლება 6000-ზე მეტი ქართველი და 2000-მდე უცხოელი სტუდენტი. ამასთანავე, საუნივერსიტეტო კლინიკაში დასაქმდება, დაახლოებით, 600 თანამშრომელი და მაღალი დონის სამედიცინო მომსახურებით უზრუნველყოფს არამარტო თბილისის, არამედ მთლიანად საქართველოს მოსახლეობას.

ღონისძიებას საქართველოს პრემიერ-მინისტრი ირაკლი ღარიბაშვილი და მინისტრთა კაბინეტის წევრები დაესწრებიან.