ზოოპარკის დირექტორი ზურაბ გურიელიძე დღეს მომხდარ ფაქტთან დაკავშირებით კომენტარს არ აკეთებს. როგორც "ინტერპრესნიუსის" კორესპონდენტი ადგილიდან იუწყება , გურიელიძემ "ლაგუნა ვერეს" მიმდებარე ტერიტორია ისე დატოვა, რომ ჟურნალისტების შეკითხვებს არ უპასუხა.
მან ასევე არ ისაუბრა სახელმწიფო უსაფრთხოებისა და კრიზისების მართვის საბჭოს მდივნის მინდია ჯანელიძისა და შინაგან საქმეთა მინისტრის ვახტანგ გომელაურის იმ განცხადებებზე, რომლის მიხედვითაც, მათ ზოოპარკის ადმინისტრაციამ მიაწოდა ინფორმაცია იმის შესახებ, რომ გარეთ არც ერთი მტაცებელი ცხოველი აღარ უნდა ყოფილიყო.
"ლაგუნა ვერეს" მიმდებარე ტერიტორიაზე ვეფხვმა ერთი ადამიანი დაგლიჯა, რომელიც გარდაიცვალა. გარდაცვლილი შუახნის მამაკაცია. ამ დროისთვის ალბინოსი ვეფხვი ლიკვიდირებულია.