რუსთავის ცენტრალურ სტადიონზე ევროკავშირის პროექტის ,,სახალისო ფეხბურთის ღია სკოლა" ფარგლებში, სპორტული ღონისძიება - ,,სპორტი, სკოლა, პოლიცია" გაიმართა. მასში მონაწილეობას რუსთავის სპორტ-სკოლების 7-დან 12 წლამდე ასაკის მოსწავლეებისგან შემდგარი 12 ჯგუფი იღებდა.

ბავშვებთან ერთად სახალისო სპორტულ თამაშებში ჩართული იყო საპატრულო პოლიციაც.

ღონისძიებას რუსთავის ვიცე-მერი ნოდარ შეროზია, ქვემო ქართლის გუბერნატორი პაატა ხიზანაშვილი, რუსთავის მერიისა და ქვემო ქართლის სამხარეო ადმინისტრაციის სხვა წარმომადგენლებიც დაესწრნენ.

"სახალისო ფეხბურთის ღია სკოლების" ტურნირის ამ კომპონენტს ჰქვია ,,სპორტი, სკოლა, პოლიცია", ის მეორე წელია რაც რუსთავში ტარდება ევროკავშირის, სპორტისა და ახალგაზრდობის საქმეთა სამინისტროს, ფეხბურთის ფედერაციის დაფინანსებით, რუსთავის მერიის ხელშეწყობითა და ორგანიზებით. ჩვენი მიზანია, რომ ამ ინვენტარით, რომელიც ღონისძიების ფარგლებში ქალაქის სასპორტო სკოლების გაერთიანებას საჩუქრად გადაეცა, ახალი საფეხბურთო ჯგუფები შევქმნათ, ბავშვები ვაზიაროთ სპორტს და ჯანსაღი ცხოვრების წესს," - განაცხადა რუსთავის ვიცე-მერმა ნოდარ შეროზიამ.

ღონისძიების დასრულების შემდეგ ტურნირის მონაწილე ბავშვებს, საჩუქრად სპორტული ინვენტარი და სამახსოვრო დიპლომები გადაეცათ.