მიუხედავად იმისა, რომ ეს ყველაფერი ჩემთვის მორალურად იოლი გადასატანი ნამდვილად არ ყოფილა, ეს ჩემს განსჯაზე არანაირ ზეგავლენას არ იქონიებს, - ამის შესახებ ”რუსთავი 2”-ის საქმის ერთ-ერთმა მოსამართლე ნათია გუჯაბიძემ დღევანდელ პროცესზე განაცხადა, რითაც მის წინააღდმეგ ”რუსთავი 2”-ის გენერალური დირექტორის, ნიკა გვარამიას მიერ გამოთქმულ ბრალდებას გამოეხმაურა.

მისივე თქმით, ”იმისთვის, რომ მოსამართლე ნათია გუჯაბიძე დაკვალიფიცირცდეს თაღლითად, უნდა არსებობდეს კანონიერ ძალაში შესული სისხლის სამართლებრივი განაჩენი, რაც ბუნებაში არ არსებობს”.

”სრული პასუხისმგებლობით ვაცხადებ და ამავე დროს საქართველოს პროკურატურამ გააკეთა ოფიციალური განცხადება, რომ არანაირი სისხლის სამართლებრივი დევნა არათუ ახლა, არამედ ჩემი 11 წლიანი სამოსამართლო მოღვაწეობის მანძილზე არასოდეს არ მიმდინარეობდა არანაირი საჩივრის საფუძველზე. არ მიმდინარეობდა ასევე არანაირი მოკვლევა.

სრული პასუხისმგებლობით ვაცხადებ, რომ არანაირი დევნა, დისციპლინური სახდელი ჩემი მისამართით არ მიმდინარეობს და არ ყოფილა გამოყენებული. თქვენს მიერ გასაჯაროებისთვის მოთხოვნილი სარეკომენდაციო ბარათს ვერ გავასაჯაროებ იმ მარტივი მიზეზის გამო, რომ ასეთ ფაქტს ბუნებაში ადგილი არ ჰქონია.

მიუხედავად ამ ცრუ ბრალდებებისა, აბსოლუტურად კონტექსტიდან ამოვარდნილი ინსინუაციებისა, მიუხედავად იმისა, რომ ეს ყველაფერი ჩემთვის მორალურად იოლი გადასატანი ნამდვილად არ ყოფილა, ეს ჩემს განსჯაზე არანაირ ზეგავლენას არ იქონიებს. მინდა იყოთ მშვიდად, ვერ დამჯაბნის ვერანაირი ემოცია, ვერც დადებითი და ვერც უარყოფითი”, - მიმართა ნათია გუჯაბიძემ ”რუსთავი 2”-ის წარმომადგენლებს.

მოსამართლე მიიჩნევს, რომ ”ყველა ეს ცრუ ბრალდება მიმართულია, როგორც მისი, ისე მთელი სასამართლოს სისტემის წინააღდმეგ, მასზე ზეგავლენის მოხდენის მცდელობის მიზნით”.

”ვიძლევი საჯაროდ პირობას, დავრჩები ბოლომდე დამოუკიდებელი და მიუკერძოებელი. მივიღებ ისეთ გადაწყვეტილებას, რასაც მარტო კანონი კი არა, სამართალი და კანონი ერთდროულად მიკარნახებს”, - განაცხადა მოსამართლემ.

სააპელაციო სასამართლოში მიმდინარე დღევანდელ პროცესზე მოსამართლეთა კოლეგიამ სხდომათა დარბაზიდან ”რუსთავი 2”-ის ადვოკატები - თამთა მურადაშვილი და დიმიტრი საძაგლიშვილი გააძევა. არხის გენერალური დირექტორი ნიკა გვარამია კი პროცესზე არ დაუშვეს.