თელავს, უახლოეს მომავალში შშმ პირებისთვის ადაპტირებული გარემოს შექმნის 5-წლიანი სტრატეგიული გეგმა ექნება, - ამის შესახებ ”ინტერპრესნიუსს” თელავის მერმა, პლატონ კალმახელიძემ განუცხადა.

მისი თქმით, აღნიშნული გეგმის შემუშავებაში თელავის თვითთმმართველობას პოლონური მხარე ეხმარება.

"ახლო მომავალში პოლონეთიდან ჩვენი პარტნიორები ჩამოდიან, რომლებიც, ხუთწლიანი გეგმის შემუშავებაში დაგვეხმარებიან, თუ როგორ გავხადოთ ჩვენი ქალაქი მაქსიმალურად ადაპტირებული ნებისმიერი საჭიროების მოქალაქისთვის", - განაცხადა პლატონ კალმახელიძემ ”ინტერპრესნიუსთან” საუბრისას.

მისივე თქმით, მიმდინარე წელს სხვადასხვა სამსახურში 12 სპეციალური საჭიროების მქონე პირი დასაქმდა.