ზაზა ხუციშვილი - 40 ტუალეტის შესახებ ჩემი განცხადება სხვანაირად შეფუთეს
40 ტუალეტის შესახებ ჩემი განცხადება სხვანაირად შეფუთეს, - ამის შესახებ ”ქართული ოცნება-დემოკრატიული საქართველოს” ვაკის მაჟორიტარობის კანდიდატმა ზაზა ხუციშვილმა ”იბერიას” ეთერში განაცხადა.
როგორც ზაზა ხუციშვილმა განმარტა, „ტუალეტები ახსენა იმ კონტექსტში, რომ საქართველოში, მათ შორის თბილისში უამრავი ტურისტი ჩამოდის“.
მისივე განმარტებით, სწორედ ამის გათვალისწინებით აპირებს თბილისის მერია საზოგადოებრივი საპირფარეშოების მოწყობაზე ტენდერის გამოცხადებას.
”40 ტუალეტის შესახებ ჩემი განცხადება გამოყენებული იყო ისე, რომ სხვანაირად შეფუთეს. მე ჩამოვთვალე ყველა ის სიკეთე, რასაც „ქართული ოცნება“ ჰპირდება ქვეყანას. ვახსენე, რომ შემოსულია უამრავი ტურისტი, როგორც შავი ზღვისპირეთში ასევე თბილისში, რაც ძალიან კარგია. აქვე მოვაყოლე ის, რომ მერია გამოაცხადებს უახლოეს მომავალში ტენდერს. არ მითქვამს რომ უნდა აშენდეს, ეს აშენდება და მერიის საქმეა. მე უბრალოდ გავაჟღერე რომ ეს ტენდერი უახლოეს მომავალში ცხადდება,” - განაცხადა ზაზა ხუციშვილმა.
