აჭარის სახანძრო სამსახურის განცხადებით, აქციის მონაწილეები საშუალებას არ აძლევენ ავტომანქანებში გაჩენილი ცეცხლის ლოკალიზება მოახდინონ
აჭარის სახანძრო-სამაშველო სამსახურის განცხადებით, აქციის მონაწილეები საშუალებას არ აძლევენ იმ ავტომანქანებში გაჩენილი ცეცხლის ლოკალიზება მოახდინონ, რომლებიც მთავარი სამმართველოს მიმდებარე ტერიტორიაზე იწვის.
როგორც „ინტერპრესნიუსს“ აჭარის სახანძრო-სამაშველო სამსახურის ხელმძღვანელმა, ხუსეინ სირაბიძემ განუცხადა, შემთხვევის ადგილზე ბრიგადები 6-ჯერ მივიდნენ, თუმცა აქციის მონაწილეებმა ცეცხლის ჩაქრობის საშუალება არც ერთხელ არ მისცეს.
აღნიშნულს თავად ადგილზე მყოფი პირების ნაწილი უარყოფს და ამტკიცებს, რომ მეხანძრეები ტერიტორიაზე საერთოდ არ გამოჩენილან.
ამ დროისთვის აჭარის მთავარი სამმართველოს მიმდებარე ტერიტორიაზე პოლიციის 4 მანქანა იწვია. ისინი აქციის მონაწილეებმა ჯერ დააზიანეს, შემდეგ კი ცეცხლი წაუკიდეს.
აღსანიშნავია, რომ აქციის მონაწილეებმა დააზიანეს, კერძოდ კი, ქვები დაუშინეს "ქართული ოცნების" დეპუტატის, ცოტნე ანანიძის ავტომობილიც, რომელიც მთავარი სამმართველოს ეზოში იყო გაჩერებული.
