მთავარი პროკურორი ვერ აკონკრეტებს, დაიკითხნენ თუ არა ბათუმში განვითარებულ მოვლენებთან დაკავშირებით ”ნაციონალური მოძრაობის” წევრები.

როგორც ირაკლი შოთაძემ ჟურნალისტებს განუცხადა, საქმე საკმაოდ მოცულობითია, ვინაიდან ამ არეულობაში საქართველოს ასეულობით მოქალაქე იყო ჩართული.

”ამ ფაქტზე გამოძიება საკმაოდ ინტენსიურად მიმდინარეობს. მე ვერ დაგიკონკრეტებთ, ვისი დაკითხვა მოხდა და ვისი უნდა მოხდეს. მიმდინარეობს სრულყოფილი გამოძიება და შესაბამისად, საქმეზე დაიკითხება ყველა, ვისი დაკითხვის საჭიროებაც იარსებებს. საკმაოდ ბევრი საპროცესო მოქმედებაა ჩატარებული. არის კონკრეტული პირების მიმართ სისხლის სამართლებრივი დევნა დაწყებული და ნაწილის მიმართ გამოყენებულია პატიმრობა, ნაწილის მიმართ კი გირაო. საქმე საკმაოდ მოცულობითია, ვინაიდან ამ არეულობაში ჩართული იყო საქართველოს ასეულობით მოქალაქე. შესაბამისად, საკმაოდ შრომატევადი საგამოძიებო მოქმედებებია ჩასატარებელი და ამ მიმართულებით გამოძიება მიმდინარეობს”, - განაცხადა ირაკლი შოთაძემ.