მასწავლებელთა პროფესიული განვითარების ეროვნული ცენტრის მიერ ორგანიზებული სასწავლო ტური ინკლუზიური განათლების 30 სპეციალისტისთვის დასრულდა.

როგორც „ინტერპრესნიუსს“ მასწავლებელთა პროფესიული განვითარების ეროვნული ცენტრიდან აცნობეს, ტურის ფარგლებში სამუშაო შეხვედრები თბილისის 10 საჯარო სკოლაში ერთი კვირის განმავლობაში მიმდინარეობდა.

„სასწავლო ტური მიზნად ისახავდა ინკლუზიური განათლების ხელშეწყობას რეგიონებში და გულისხმობდა რეგიონების სკოლებში დასაქმებული სპეციალისტებისთვის გამოცდილების გაზიარებას წარმატებული პრაქტიკის მქონე სკოლებში. ტურის ფარგლებში მასწავლებლები გაეცნენ სწავლების და სსსმ (სპეციალური საგანმანათლებლო საჭიროების მქონე) მოსწავლის კლასში ინტეგრაციის ეფექტიან სტრატეგიებს ასევე, დააკვირდნენ, თუ რა ფაქტორები განაპირობებს ინკლუზიური განათლების წარმატებას ამა თუ იმ სკოლაში“, - ნათქვამია ინფორმაციაში.

სასწავლო ტურის მონაწილეთა შესარჩევი კონკურსი მასწავლებელთა პროფესიული განვითარების ეროვნულმა ცენტრმა მიმდინარე წლის მარტში გამოაცხადა, რის შედეგად შეირჩა ინკლუზიური განთლების 30 სპეციალისტი. შერჩეული სპეციალისტები გადანაწილდნენ 10 ინკლუზიურ სკოლაში, სადაც მათ სუპერვიზორები ჰყავდათ.

სასწავლო ტური უკვე მეორედ ჩატარდა. ცენტრმა აღნიშნული პროექტის განხორციელება გასული წელს დაიწყო.