საქართველოს კომუნიკაციების ეროვნულმა კომისიამ ტელეკომპანია GG TV და ინტერნეტ რადიო Georgian Day კანონით განსაზღვრულ ვადაში ინფორმაციის წარმოუდგენლობის გამო წერილობით გააფრთხილა.

კერძოდ, როგორც „ინტერპრესნიუსს“ საქართველოს კომუნიკაციების ეროვნული კომისიიდან აცნობეს, „მაუწყებლობის შესახებ“ საქართველოს კანონის 61-ე მუხლის შესაბამისად, მაუწყებლები ვალდებულნი არიან ყოველწლიურად, არაუგვიანეს 1-ელი თებერვლისა, გამოაქვეყნონ და კომისიას წარმოუდგინონ შემდეგი ინფორმაცია: ა) შესაბამისობის დეკლარაცია; ბ) მაუწყებლის სფეროში სხვა ლიცენზიის ფლობის ან მაუწყებლობის ავტორიზაციის შესახებ; გ) სხვა მაუწყებელში წილის ან აქციების ფლობის შესახებ; დ) პერიოდული ბეჭდვითი გამოცემის ფლობის შესახებ; ე) პერიოდულ ბეჭდვით გამოცემაში წილის ან აქციების ფლობის შესახებ; ვ) საინფორაციო სააგენტოს ფლობის შესახებ; ზ) საინფორმაციო სააგენტოში წილის ან აქციების ფლობის შესახებ; თ) სხვა საწარმოს ან სხვა საწარმოში წილის ან აქციების 5%-ის ან მეტის ფლობის შესახებ.

კომისიამ ორივე მაუწყებლის ზემოთაღნიშნული ვალდებულების თაობაზე გამაფრთხილებელი წერილი ორეჯერ გაუგზავნა, თუმცა არცერთ მათგანს ინფორმაცია კომისიაში დღემდე არ წარმოუდგენია. ინმეწარმე მაკა სამუშიას და შპს „მრ. ფაბლიშერს“, გარდა წერილობითი გაფრთხილებისა, „მაუწყებლობის შესახებ“ საქართველოს კანონით განსაზღვრული ინფორმაციის კომისიაში წარმოდგენა დაევალა. კომისიის ორივე გადაწყვეტილების ვრცელი ვერსია ხელმისაწვდომია კომისიის გადაწყვეტილებების გვერდზე.