”საქართველოს გენერალთა კლუბი” კონტრ-ადმირალ ალექსანდრე ჯავახიშვილის გარდაცვალების გამო ღრმა მწუხარებას გამოთქვამს, - ამის შესახებ „ინტერპრესნიუსს“ საქართველოს ვეტერანთა სახელმწიფო სამსახურიდან აცნობეს.

„ალექსანდრე ჯავახიშვილი გახლდათ ატომური სტრატეგიული წყალქვეშა ნავის პირველი მეთაური, რომელმაც 1972 წელს ბალისტიკურ-სარაკეტო, წყალქვეშა ატომური კრეისერით დედამიწას შემოუარა. 1992-97 წლებში ის იყო საქართველოს თავდაცვის სამინისტროს სამხედრო-საზღვაო ძალების სარდალი, 2000 წლიდან - საქართველოს თავდაცვის ეროვნული აკადემიის პრორექტორი. ალექსანდრე ჯავახიშვილი დაჯილდოებულია 2 ორდენით და 13 მედლით.

საქართველოს გენერალთა კლუბი ღრმა წუხილს გამოთქვამს და სამძიმარს უცხადებს ალექსანდრე ჯავახიშვილის ოჯახის წევრებს, მეგობრებს, თანამებრძოლებს და კოლეგებს“, - აღნიშნულია საქართველოს ვეტერანთა სახელმწიფო სამსახურის ინფორმაციაში.