ქურდული სამყაროს წევრობის ბრალდებით დაკავებულ დავით და ტარიელ მახარობლიძეებს "გლეხოვიჩთან" (ზაალ მახარობლიშვილი) ნათესაური კავშირი აქვთ, - ამის შესახებ ჟურნალისტებს დაკავებულების ადვოკატმა ტარიელ კაკაბაძემ განუცხადა. მისივე ინფორმაციით, ისინი ბიძაშვილები არიან.

დაცვის მხარე დაკავებულებისთვის 10 ათასი ლარის ოდენობით გირაოს შეფარდებას მოითხოვს.

"არც დავით მახარობლიძე და არც ტარიელ მახარობლიძე არ აღიარებს დანაშაულს. ისინი ზაალ მახარობლიშვილის ბიძაშვილები არიან. დღევანდელ პროცესზე ბრალდების მხარე დააყენებს შუამდგომლობას და მოითხოვს აღმკვეთის ღონისძიების ყველაზე მძიმე ფორმას - პატიმრობას, თუმცა დაცვის მხარე მოვითხოვთ თითოეულზე 10 ათას ლარიანი გირაოს შეფარდებას, რადგან პატიმრობის საფუძველი არ არსებობს. საბოლოოდ, მაინც არ დამტკიცდება ის ბრალი, რაც მათ აქვთ წარდგენილი", - განაცხადა ადვოკატმა.

აღმკვეთის ღონისძიების შესახებ თბილისის საქალაქო სასამართლო 16:00 იმსჯელებს.

ქურდული სამყაროს წევრობის ბრალდებით გუშინ დავით და ტარიელ მახარობლიძეები და გიორგი რეხვიაშვილი დააკავეს.