საქართველოს რეგიონებში საჯარო სკოლების სათბობი შეშით მომარაგების პროცესი, რომელიც სსიპ ეროვნულმა სატყეო სააგენტომ მიმდინარე წლის აგვისტოს თვიდან დაიწყო დასასრულს უახლოვდება.

როგორც ”ინტერპრესნიუსს” ეროვნული სატყეო სააგენტოდან აცნობეს, დღეის მდგომარეობით სრულად მომარაგებულია 5 რეგიონის საჯარო სკოლა, ხოლო, 4 რეგიონში სამუშაოები ინტენსიურ რეჟიმში გრძელდება.

”მიმდინარე წელს განხორციელებული საკანონმდებლო ცვლილებების შედეგად, სააგენტო შეშით მომარაგებით მომსახურებას ქვეყნის მასშტაბით 1600-მდე, იმ საჯარო სკოლას უწევს, რომლებიც გასათბობად ძირითადად მერქნულ რესურსზე არიან დამოკიდებულნი.

პროცესის წარმატებულობას ადასტურებენ რეგიონალური საგანმანათლებლო რესურსცენტრებისა და სკოლების წარმომადგენლებიც, რადგან სკოლები ზამთრის სეზონს მომზადებულები ხვდებიან.

აღნიშნული ინიციატივა ქვეყანაში მდგრადი ტყის მართვის დანერგვისათვის გადადგმული კიდევ ერთი ნაბიჯია, ამავდროულად, სსიპ ეროვნული სატყეო სააგენტო აქტიურად მუშაობს ქვეყანაში მერქნული რესურსით სარგებლობის ეფექტური მექანიზმის შექმნისა და ბუნებრივ ტყეზე ზეწოლის შემცირების მიზნით ალტერნატიული სათბობი საშუალებების დანერგვის მიმართულებით”, - აცხადებენ ეროვნულ სატყეო სააგენტოში.