ეროვნულ ბიბლიოთეკაში წიგნის მუზეუმი გაიხსნა

საქართველოს პარლამენტის ეროვნული ბიბლიოთეკის პირველ კორპუსში კავკასიაში უდიდესი და ევროპაში ერთ-ერთი საუკეთესო წიგნის მუზეუმი გაიხსნა. ორგანიზატორები მიიჩნევენ, რომ ეს არის ბოლო ათწლეულების ყველაზე მასშტაბური პროექტი ამ სფეროში.

მუზეუმის გახსნის ღონისძიებას კულტურისა და ძეგლთა დაცვის მინისტრი, პარლამენტის წევრები, დიპლომატიური კორპუსის წარმომადგენლები და საზოგადოების სხვადასხვა სფეროს წარმომადგენლები ესწრებოდნენ.

როგორც კულტურის მინისტრმა, მიხეილ გიორგაძემ განაცხადა, ათწლეულების შემდეგ ახდა გალაკტიონის ოცნება და საქართველოს აქვს საუკეთესო წიგნის მუზეუმი.

„ეს ადგილი მიმზიდველი იქნება არა მხოლოდ წიგნის მოყვარულებისთვის, არამედ ყველა სხვა სფეროს წარმომადგენლებისთვის. მუზეუმში დაცული იქნება 19 000-ზე მეტი უნიკალური გამოცემა. მინდა მადლობა გადავუხადო ამერიკის შეერთებული შტატების, პოლონეთისა და იტალიის საელჩოებს წიგნის მუზეუმის გახსნაში შეტანილი წვლილისთვის“, - განაცხადა მიხეილ გიორგაძემ.

მუზეუმში დაცული ძვირფასი წიგნების გამოფენა ოთხ ნაწილადაა გაყოფილი: 1. საკუთრივ იშვიათი გამოცემების მუზეუმი, სადაც სიძველით და ფორმით გამორჩეული წიგნებია წარმოდგენილი - მაგალითად, ქართულ-იტალიური ლექსიკონი 1629 წლის, ვახტანგის სტამბის გამოცემები, ინკუნაბულა და სხვ. 2. „ვეფხისტყაოსნის“ მუზეუმი - აქ წარმოდგენილია პოემის ყველა გამოცემა ქართულ და უცხოურ ენებზე; 3. ილიას დარბაზი - ილია ჭავჭავაძის კაბინეტის ექსპოზიცია, მისი პირადი ნივთებითა და ბიბლიოთეკით; 4. ბროსეს საცავი - ულტრათანამედროვე საცავი აღჭურვილია შესაბამისი კლიმატკონტროლის აპარატურით.

ქვეყნის მთავარი ბიბლიოგრაფიული კვანძის - ეროვნულ ბიბლიოთეკაში დაცული იშვიათი გამოცემებისთვის ულტრათანამედროვე საცავის და მუზეუმის გამართვა ბიზნესის თანადგომით გახდა შესაძლებელი. ეროვნული ბიბლიოთეკის პარტნიორი იყო დავით ბეჟუაშვილის განათლების ფონდი.