თბილისის საკრებულოს თამარ მეფის დარბაზში, დღეს პირველი დემოგრაფიული ფორუმის ფარგლებში, ახალგაზრდებთან შეხვედრა გაიმართება, - ამის შესახებ „ინტერპრესნიუსს“ „დემოგრაფიული აღორძინების ფონდიდან“ აცნობეს.
მათივე ინფორმაციით, შეხვედრას დაესწრებიან და ახალგაზრდებს სიტყვით მიმართავენ თბილისის მერი კახი კალაძე, განათლებისა და მეცნიერების მინისტრის მოადგილე თემურ მურღულია.
ამასთან, ქვეყნის დემოგრაფიული პოლიტიკისა და ახალგაზრდების ბოლო სტატისტიკური მონაცემების შესახებ მოხსენებას პარლამენტის ჯანდაცვისა და სოციალურ საკითხთა კომიტეტის თავმჯდომარის პირველი მოადგილე დიმიტრი ხუნდაძე გააკეთებს.
„დემოგრაფიული აღორძინების ფონდის“ ხელმძღვანელი თამარ ჩიბურდანიძე ახალი ახალგაზრდული პროექტის „მე-ოჯახი-სახელმწიფოს“ პრეზენტაციას გამართავს.
შეხვედრას უნივერსიტეტების და ახალგაზრდული ორგანიზაციების სტუდენტი-ახალგაზრდები, მათ შორის, შეზღუდული შესაძლებლობების მქონე პირები და ეთნიკური უმცირესობების წარმომადგენლები დაესწრებიან.
ახალგაზრდები წარმოადგენენ საკუთარ ხედვებს და გაიმართება დიალოგი მოწვეულ სტუმრებთან.