თსსუ-ში დოკუმენტური ფილმის „საბედისწერო 13“ პრემიერა გაიმართა

თბილისის სახელმწიფო სამედიცინო უნივერსიტეტში, პირველი ქართული სამედიცინო ტელევიზიის „პულსის“ მიერ გადაღებული დოკუმენტური ფილმის „საბედისწერო 13“ პრემიერა გაიმართა. დოკუმენტურ ფილმში ასახული იყო აფხაზეთის ომში მონაწილე ექიმების თვალით დანახული მოვლენები და წარმოდგენილი იყო ისტორიები, რომელიც ფართო აუდიტორიისთვის აქამდე უცნობი იყო.

უნივერსიტეტის აუდიტორიაში ფილმის ჩვენებას, უნივერსიტეტის რექტორი ზურაბ ვადაჭკორია, პროფესორები, სტუდენტები და დოკუმენტური ფილმის გმირები ესწრებოდნენ. ასევე პრემიერას დაესწრნენ ომის დროს, სამედიცინო უნივერსიტეტის გარდაცვლილ სტუდენტთა მშობლებიც. ფილმის ჩვენება, აფხაზეთის ომში გარდაცვლილი სამედიცინო სამსახურის წარმომადგენლებთა პატივის მისაგებად, წუთიერი დუმილით დაიწყო.

თბილისის სახელმწიფო სამედიცინო უნივერსიტეტის რექტორის, პროფესორ ზურაბ ვადაჭკორიას თქმით, დოკუმენტურ ფილმს დიდი მნიშვნელობა აქვს პოლიტიკური თვალსაზრისით და მის ავტორებს, მადლობა გადაუხადა. როგორც თსსუ-ს რექტორმა აღნიშნა, დოკუმეტურ ფილმშიც კარგად იკვეთება, თუ რა როლი აქვს ექიმს და რამდენი რამის გაკეთება შეუძლია, უიარაღო სამედიცინო სამსახურს ბრძოლის წინა ხაზზე.

„ძალიან დიდი საქმე გააკეთა ტელეკომპანია „პულსმა“. გარდა იმისა, რომ მნიშვნელოვანი როლი გამოაჩინა ექიმებისა და სამედიცინო სამსახურის, მას ძალიან დიდი პოლიტიკური მნიშვნელობაც აქვს მომავლისთვის ქართულ-აფხაზურ ურთიერთობებში.

მე ვფიქრობ, რომ ამ ფილმს ქართული საზოგადოება მიიღებს ისე, როგორც მისაღებია. ძალიან მძიმე სანახავი იყო ეს ყველაფერი, მაგრამ მნიშვნელოვანი და საჭირო იყო ამ თემის ჩვენება. დიდი მადლობა ყველას“, - განაცხადა ზურაბ ვადაჭკორიამ.