შინაგან საქმეთა სამინისტროს გენერალურმა ინსპექციამ ქურდობის მცდელობისთვის ბრალდებული პირების, ლევან კუპატაძის და დავით სარალიძის განცხადებების საფუძველზე, რომლებიც პოლიციას არაადამიანურ მოპყრობასა თავისუფლების უკანონოდ აღკვეთაში ადანაშაულებენ, მოკვლევა დაიწყო. ამის შესახებ ”ინტერპრესნიუსს” თავად სამინისტროში განუცხადეს.

”შინაგან საქმეთა სამინისტროსთვის არ მოუმართავთ აღნიშნულ პირებს, მაგრამ მიუხედავად ამისა შსს-ს გენერალურმა ინსპექციამ დაიწყო ფაქტის შესწავლა”, - აცხადებენ უწყებაში.

კუპატაძე და სარალიძე პოლიციას უფლებამოსილების გადამეტების, არაადამიანური მოპყრობისა და თავისუფლების უკანონოდ აღკვეთის მცდელობაში ადანაშაულებენ. აღნიშნული პირები ქურდობის მცდელობისთვის არიან ბრალდებულები და გირაოს სანაცვლად იმყოფებიან თავისუფლებაში. მათი შემდეგი სასამართლო პროცესი ჩანიშნულია 11 იანვარს. როგორც ბრალდებული აცხადებენ, ფიზიკური ზეწოლის ფაქტს ადასტურებს ექსპერტიზის დასკვნაც.

„შემაგდეს პატარა მანქანაში. გაუჩერებლად მიდიოდა ცემა თავში, გვერდებში, ინსტიქტურად თავზე ხელებს ვიფარებდი. ხელები ამოიტრიალეს, ბორკილები დამადეს“, - განაცხადა დავით სარალიძემ.