სომხეთის ეროვნული უშიშროების სამსახურმა ქვეყანაში მომზადების სტადიაზე მყოფი რამდენიმე მძიმე დანაშაული, მათ შორის ტერაქტები აღკვეთა. ამის შესახებ უწყების საიტზე განთავსებულ განცხადებაშია ნათქვამი.
„ოპერატიულ-სამძებრო და საგამოძიებო მოქმედებების შედეგად, სომხეთის ეროვნული უშიშროების სამსახურმა დაადგინა, რომ აშშ-ს მოქალაქე რ.კ.-მ 2017 წლის სექტემბერში სოციალურ ქსელ „ფეისბუქში“ დაარეგისტრირა ყალბი პროფილი, რომლიდანაც დაჯგუფება „სამართლიანობის სახელით მებრძოლების“, მისი ტაქტიკის, დისციპლინის, უსაფრთხოებისა და კონსპირაციის ზომების შესახებ მასალებს ავრცელებდა“, - ნათქვამია განცხადებაში.
უწყებაში აღნიშნავენ, რომ მოპოვებული მტკიცებულებების საფუძველზე ცხადი გახდა, რომ აღნიშნული პირი კონსულტაციებისა და მითითებების გაცემის გზით სომხეთის ტერიტორიაზე ტერაქტებს გეგმავდა.
„აშშ-ს მოქალაქე რ.კ. ძებნაშია გამოცხადებული. საქმეზე არსებული მასალები გადაცემულია აშშ-ს კომპეტენტურ ორგანოებისთვის“, - აღნიშნულია სომხეთის ეროვნული უშიშროების სამსახურის განცხადებაში.