„ნაცმოძრაობის წევრი“- აჭარაში რამდენიმე სკოლაში სარეაბილიტაციო სამუშაოები 2014-2017 წლებში ჩატარდა, თუმცა გათბობის სისტემა არ არის

"ერთიანი ნაციონალური მოძრაობის" აჭარის უმაღლესი საბჭოს დეპუტატის ასმათ დიასამიძის განცხადებით, ქობულეთის მუნიციპალიტეტის ცეცხლაურის #2 საბაზო სკოლაში, ცეცხლაურის #1 საჯარო სკოლაში, სოფელ კვირიკეს #1 საჯარო სკოლაში, ოჩხამურის საჯარო სკოლაში ინფრასტრუქტურა დაზიანებულია. როგორც დეპუტატი ამბობს, აღნიშნულ საჯარო სკოლებში სარეაბილიტაციო სამუშაოები 2014-2017 წლებში ჩატარდა, თუმცა გათბობის სისტემა არ არის.

ოპოზიციის წარმომადგენელი ხელისუფლებას რეაგირებისკენ მოუწოდებს.

"ქობულეთის მუნიციპალიტეტში საჯარო სკოლებში ჩატარებული მონიტორინგის შედეგებს წარმოგიდგენთ. ცეცხლაურის #2 საბაზო სკოლაში, ცეცხლაურის #1 საჯარო სკოლაში, სოფელ კვირიკეს #1 საჯარო სკოლასა, ოჩხამურის საჯარო სკოლაში სავალალო მდგომარეობაა. ამ სკოლებში გათბობა არსად არ არის მოწესრიგებული. სოფელ კვირიკის საჯარო სკოლაში, სადაც სწავლა 2017 წელს განახლდა, საქვაბე არ არის. სკოლებში სწავლა სიცოცხლისთვის საშიშია. სპორტული დარბაზები საშინელ მდგომარეობაშია",- აცხადებს ასმათ დიასამიძე.