დედაქალაქი დღეს მიიღებს იმ ბიუჯეტს, რომელსაც მოსახლეობამ წინასაარჩევნოდ მხარი დაუჭირა, - ამის შესახებ თბილისის საკრებულოს უმრავლესობის წევრმა ირაკლი ზარქუამ ჟურნალისტებს განუცხადა.
ზარქუამ 2018 წლის ბიუჯეტის პროექტთან დაკავშირებით კომენტარი გააკეთა.
„დღეს მნიშვნელოვანი დღეა, დავამტკიცებთ იმ ბიუჯეტს, რომელშიც ასახული იქნება ის პრიორიტეტები, რომელსაც წინასაარჩევნოდ მოსახლეობის უმრავლესობამ მისცა ხმა. კიდევ ერთხელ რომ განვსაზღვროთ ეს პრიორიტეტები - სოციალური მიმართულების დაფინანსება იზრდება 10 მილიონი ლარით წლევანდელ წელთან შედარებით, ინფრასტრუქტურული პროექტებისთვის გათვალისწინებული იქნება 330 მილიონ ლარზე მეტი, ეს არის ცალკეული სპორტული მოედნებისა და მულტიფუნქციური ცენტრების მოწყობა, რომელიც ნოუჰაუა და ჩვენ წინასაარჩევნოდ დავაანონსეთ. ყველა ის მიმართულება, რომელიც ჩვენ გვქონდა პრიორიტეტად ჩამოყალიბებული, მათ შორის ეკოლოგია და გამწვანება, ბუნებრივია, ეს ასახულია ბიუჯეტში. აქედან, გამომდინარე, დღეს დედაქალაქი მიიღებს იმ ბიუჯეტს, რომელსაც მოსახლეობამ მხარი დაუჭირა“, - განაცხადა ირაკლი ზარქუამ.