ანკარა გაერო-ს იერუსალიმის ისრაელის დედაქალაქად აღიარების გადაწყვეტილების გაუქმების მოთხოვნით მიმართავს

ანკარა გაერო-ს აშშ-ს მიერ იერუსალიმის ისრაელის დედაქალაქად აღიარების გადაწყვეტილების გაუქმების მოთხოვნით მიმართავს, - ამის შესახებ თურქეთის პრეზიდენტმა რეჯეფ თაიფ ერდოღანმა განაცხადა.

„ჯერ თურქეთი გაერო-ს უშიშროების საბჭოს მიმართავს. თუ საბჭოს რომელიმე მუდმივმოქმედი წევრი ქვეყანა ვეტოს გამოიყენებს, ანკარა ამ საკითხს გენერალური ასამბლეის დღის წესრიგში შეიტანს და გააკეთებს ყველაფერს, რათა იერუსალიმის საკითხზე მიღებული უკანონო და უსამართლო გადაწყვეტილება გაუქმდეს“, - განაცხადა ერდოღანმა.

შეგახსენებთ, რომ 6 დეკემბერს აშშ-ს პრეზიდენტმა დონალდ ტრამპმა იერუსალიმი ისრაელის დედაქალაქად აღიარა და აშშ-ს საელჩოს იერუსალიმში გადატანის ბრძანება გასცა.

ისრაელი იერუსალიმს საკუთარ განუყოფელ დედაქალაქად მიიჩნევს, პალესტინელები კი ცდილობენ ქალაქის აღმოსავლეთ ნაწილი საკუთარი მომავალი სახელმწიფოს დედაქალაქად აქციონ.