ჩვენ ვმუშაობთ იმისთვის, რომ გაიზარდოს კონსოლიდაციის ხარისხი პოლიტიკურ სისტემაში და პარტიათა ინსტიტუციონალიზაციის დონე - ეს ყველაფერი დაგვაზღვევს რისკებისგან გრძელვადიან პერსექტივაში, - ამის შესახებ პარლამენტის თავმჯდომარემ ირაკლი კობახიძემ პარლამენტის პლენარულ სხდომაზე, კონსტიტუციის ახალ რედაქციაში დაგეგმილი ცვლილებების პროექტის წარდგენისას განაცხადა.

“ჩვენ ვვითარდებით და დარწმუნებული ვარ, რომ ჩვენი პოლიტიკური სისტემა კონსოლიდაციის მაღალ ხარისხს მიაღწევს. ჩვენ მივაღწევთ პარტიული სისტემის ინსტიტუციონალიზაციის უფრო მაღალ ხარისხს. ეს იქნება წინაპირობა იმისა, რომ 2024 წელს, როცა მთლიანად პროპორციულ საარჩევნო სისტემაზე გადავალთ, პოლიტიკური კულტურის დეფიციტი პოლიტიკური პროცესების და სტაბილური სახით განვითარების პრობლემას აღარ შექმნის“, - განაცხადა ირაკლი კობახიძემ.

კობახიძემ დღეს ხაზგასმით აღნიშნა, რომ ოპოზიცია სხდომათა დარბაზში არ არის და მხარს არ უჭერს სწორედ იმ ცვლილებებს, რაც კონსტიტუციაში სწორედ მათი მოთხოვნის საფუძველზე შედის. კობახიძის თქმით, ეს პოლიტიკურ სპექტრში პოლიტიკური კულტურის დაბალ დონეზე მეტყველებს.