8 - 11 დეკემბერს, საბაჟო გამშვებ პუნქტებში ,,ყაზბეგი“, ,,სადახლო-საავტომობილო“, ,,გუგუთი“ და ,,ქუთაისის აეროპორტი“, ნარკოტიკული და ფსიქოტროპული ნივთიერებების შემცველი მედიკამენტების ქვეყნის საზღვარზე უკანონოდ შემოტანის ფაქტები აღიკვეთა. ამის შესახებ „ინტერპრესნიუსს“ ფინანსთა სამინისტროს შემოსავლების სამსახურიდან აცნობეს.
უწყების ინფორმაციით, მებაჟე ოფიცრებმა, ეჭვის საფუძველზე, საქართველოსა და სომხეთის მოქალაქეების ა.ბ-ს, გ.ქ-ს, ნ.ხ-ს, დ.გ-სა და ა.პ-ს კუთვნილი ავტომობილებისა და ფიზიკური დათვალიერების შედეგად, ნარკოტიკული (832 აბი) და ფსიქოტროპული (6 კაფსულა) ნივთიერებების შემცველი მედიკამენტები, ასევე, ნარკოტიკული ნივთიერება მარიხუანა (3 გრამი) აღმოაჩინეს.
საქმეთა მასალები, შემდგომი რეაგირების მიზნით, შინაგან საქმეთა სამინისტროს შესაბამის ერთეულებს გადაეცათ.