ძალიან მიხარია ის, რომ მომდევნო წლები იქნება წარმატების წლები და უახლოეს მომავალში თბილისი იქნება სიხარულით, სიყვარულით და სიცოცხლით სავსე ქალაქი, - ამის შესახებ დედაქალაქის მერმა კახა კალაძემ ჟურნალისტებს საკრებულოს სხდომის დასრულების შემდეგ განუცხდა, სადაც თბილისის ბიუჯეტი დაამტკიცეს.
"პირველ რიგში მინდა მივულოცო დედაქალქის მოსახლეობას. ძალიან მიხარია და მნიშვნელოვანია ის, რომ დამტკიცდა დედაქალაქის ბიუჯეტი. ეს არის ის პროგრამა, რომელსაც დედაქალაქის მოსახლეობამ მხარი დაუჭირა. ჩვენ ვართ ვალდებული, რომ განვახორციელოთ ყველა ის პროექტი, რომელზეც ვსაუბრობდით წინასაარჩევნო კამპანიის დროს. ჩვენ ვიწყებთ საზოგადოებრივი ტრანსპორტის ჩანაცვლებას, ვიწყებთ მუშაობას არსებული ეკოლოგიური მდგომარეობის გაუმჯობესებაზე. ვიცით, რომ არის საცობების პრობლემა, დაგეგმილია ინფრასტრუქტურული პროექტები”,- განაცხადა კალაძემ.
თბილისის საკრებულომ 2018 წლის ბიუჯეტის პროექტი დაამტკიცა. დედაქალაქის მომავალი წლის მთავარ საფინანსო დოკუმენტს 38-მა დეპუტატმა დაუჭირა მხარი, 2 კი წინააღმდეგი იყო. სულ კენჭისყრაში 40 დეპუტატი მონაწილეობდა.