კანადაში საქართველოს საელჩომ, ოტავას სასტუმრო „ფეარმონტ შატო ლორიეში“ საზეიმო მიღება მოაწყო, რომელიც საქართველოსა და კანადას შორის დიპლომატიური ურთიერთობების დამყარების 25 წლისთავს მიეძღვნა.
როგორც „ინტერპრესნიუსს“ საქართველოს საგარეო საქმეთა სამინისტროდან აცნობეს, მოწვეულ სტუმრებს შორის იყვნენ კანადის ხელისუფლების წევრები, პოლიტიკოსები, საგარეო საქმეთა და თავდაცვის სამინისტროების მაღალი თანამდებობის პირები, სხვადასხვა სააგენტოს აკადემიური წრეების წარმომადგენლები, ჟურნალისტები, ბიზნესმენები, საზოგადოების ცნობილი წევრები, დიპლომატიური მისიების ხელმძღვანელები. სტუმრებს საქართველოს ელჩმა კონსტანტინე ქავთარაძემ მიმართა, რომელმაც საქართველოსა და კანადის თანამშრომლობაზე, კანადის მიერ საქართველოს სუვერენიტეტისა და ტერიტორიული მთლიანობის ერთმნიშვნელოვან მხარდაჭერაზე, საქართველოში მიმდინარე რეფორმებზე ისაუბრა. ასევე, გაიხსენა ქართველები, რომლებიც მე-20 საუკუნის პირველ ნახევარში კანადაში მოღვაწეობდნენ და ორ ქვეყანას შორის სავაჭრო-ეკონომიკური ურთიერთობების განვითარების მნიშვნელობა აღნიშნა.
მიღების ფარგლებში გაიმართა გამოფენა, რომელიც ქართულ ეროვნულ სამოსს მიეძღვნა. საელჩო სტუმრებს ქართული ღვინით გაუმასპინძლდა.