ხელვაჩაურში, ცენტრალურ საავტომობილო გზაზე ავტოსაგზაო შემთხვევის შედეგად სამი ადამიანი დაშავდა. ერთმანეთს ორი მსუბუქი ავტომობილი შეეჯახა.
როგორც ბათუმის სასწრაფო-სამედიცნო დახმარების ცენტრის დირექტორის მოადგილე ბადრი პაქსაძემ "ინტერპრესნიუსთან" საუბრისას განაცხადა, დაშავებულები ერთი ოჯახის წევრები არიან.
"ავტოსაგზაო შემთხვევისას ცოლი, ქმარი და შვილი დაშავდა. ცოლ-ქმარს ქვედა კიდურები დაუზიანდათ, ისინი კლინიკა "მედინაში" არიან გადაყვანილი, ხოლო მოზარდი მუცლის დახურული ტრავმით ბათუმის დედათა და ბავშვთა სამედიცინო ცენტრშია მოთავსებული",- აცხადებს ბადრი პაქსაძე.
შინაგან საქმეთა სამინისტროს ინფორმაციით, მომხდარზე გამოძიება სსკ-ის 276-ე მუხლის პირველი ნაწილით მიმდინარეობს, რაც სატრანსპორტო მოძრაობისას წესების დარღვევას გულისხმობს.