პარლამენტში სუამ-ის საპარლამენტო ასამბლეის ბიუროსა და ბალტიის ასამბლეის პრეზიდიუმის შეხვედრა გაიმართა

საქართველოს პარლამენტში სუამ-ის საპარლამენტო ასამბლეის ბიუროსა და ბალტიის ასამბლეის პრეზიდიუმის შეხვედრა გაიმართა.

პარლამენტის პრესსამსახურის ინფორმაციით, სუამ-ის საპარლამენტო ასამბლეამ და ბალტიის ასამბლეამ ერთობლივი განცხადება შეიმუშავა რომელსაც ხვალ, სუამ-ის საპარლამენტო ასამბლეის რიგით მეათე ყოველწლიურ სესიაზე მოეწერება ხელი.

“შევთანხმდით ერთობლივ განცხადებაზე, რომელსაც ხვალინდელ სესიაზე მოეწერება ხელი. ვაპირებთ ძალიან მჭიდროდ ვითანამშრომლოთ ბალტიისპირეთისა და სუამ-ის საპარლამენტო ასამბლეებს შორის. განცხადებაში ასახულია ბალტიისპირეთის მხარდაჭერა აღმოსავლეთ პარტნიორობის ქვეყნების მიმართ ევროკავშირთან დაახლოების გზაზე“, - განაცხადა სუამ-ის საპარლამენტო ასამბლეის თავმჯდომარემ გიორგი მოსიძემ.

“ყველნი ვთანხმდებით, რომ ის საერთაშორისო სივრცე, რომელშიც ჩვენ ყველას, გარკვეული რესურსი გაგვაჩნია, ერთობლივად მოვახმაროთ საერთო ინტერესების გაძლიერებას - ევროპული მშვიდობის და პროგრესის ხელშეწყობას“, - განაცხადა გედევან ფოფხაძემ.

დღეს გამართულ შეხვედრაში, სუამ-ის საპარლამენტო ასამბლეის, ბალტიისპირეთის ქვეყნების წარმომადგენლები და ბენელუქსის საპარლამენტო ასამბლეის პრეზიდენტი მონაწილეობდა.

საქართველოს პარლამენტიდან შეხვედრაში მონაწილეობდნენ გიორგი მოსიძე, გიორგი გაჩეჩილაძე და გედევან ფოფხაძე.