კიევში, ”ოქტომბრის სასახლესთან” განვითარებულ მოვლენებთან დაკავშირებით, პოლიციამ სისხლის სამართლის ორი საქმე აღძრა. უკრაინული მედიის ინფორმაციით, ამის შესახებ ეროვნული პოლიციის სპიკერმა იაროსლავ ტრაკალომ განაცხადა.
მისი თქმით, საქმე აღიძრა სახელმწიფო ან საზოგადოებრივი შენობების აღების მუხლით, რომელიც თავისუფლების 5 წლამდე აღკვეთას ითვალისწინებს. მეორე საქმე სამართალდამცავი ორგანოს თანამშრომლისთვის საშიშროების შექმნის მუხლით აღძრეს, რაც 12 წლამდე თავისუფლების აღკვეთას ითვალისწინებს.
იგეგმება მესამე საქმის აღძვრა, რომელიც სამართალდამცველებს საქმიანობაში ხელის შეშლას გულისხმობს.
ტრაკალოს განცხადებით, დაკავებული ჯერ არავინ არის, თუმცა, რამდენიმე სამართალდამცავი დაშავდა.
„იმპიჩმენტის მარშის“ წევრებმა გუშინ გამართული აქციის შემდეგ „ოქტომბრის სასახლეში“ შეღწევა სცადეს, რისი საშუალებაც მათ პოლიციამ არ მისცა. სამართალდამცველებმა ცრემლსადენი გაზიც გამოიყენეს. უკრაინული მედიის ინფორმაციით, „ოქტომბრის სასახლეზე“ შეტევის შემდეგ მიხეილ სააკაშვილმა მომხრეების კვლავ მაიდანზე დაბრუნება შეძლო, მაიდინდან კი მათ უკრაინის რადასკენ გადაინაცვლეს.