ტელეკომპანია “რუსთავი 2” - ის წარმომადგენლის, თამთა მურადაშვილის ინფორმაციით, მაუწყებლობის შესახებ კანონპროექტთან დაკავშირებით, პრეზიდენტს არასამთავრობო ორგანიზაციებთან და ტელევიზიის წარმომადგენლებთან შეხვედრაზე მკაფიო პოზიცია არ გამოუხატავს. როგორც მურადაშვილმა ჟურნალისტებს შეხვედრის დასრულების შემდეგ განუცხადა, პრეზიდენტი მზად არის, რომ ის კითხვები, რომელიც დღევანდელ შეხვედრაზე დაფიქსირდა, დასვას ”საზოგადოებრივი მაუწყებლის” წარმომადგენლებთან შეხვედრაზე.
"ეს კანონპროექტი ამ სახით აზარალებს ყველა კომერციულ და კერძო ტელევიზიას. ის მორგებულია მხოლოდ ”საზოგადოებრივი მაუწყებლის” ვითომ განვითარებაზე. ამ კანონპროექტით ირღვევა კონკურენციის მთავარი პრინციპი, რისი ვალდებულებაც აღებული აქვს საქართველოს. ამ საკითხის განხილვა ხდება მხოლოდ ერთ ჭრილში - ”საზოგადოებრივი მაუწყებლის” ხელშეწყობის ჭრილში და ამის ფონზე ხდება კერძო მაუწყებლების დაჩაგვრა",- განაცხადა მურადაშვილმა.