გარკვეულმა ინტერპრეტაციებმა ფრაქციების შექმნა დააჩქარა, - ამის შესახებ საპარლამენტო უმრავლესობის ერთ-ერთმა ლიდერმა, მამუკა მდინარაძემ განაცხადა. მისივე თქმით, ორი ახალი ფრაქცია, სავარაუდოდ, წლის ბოლომდე შეიქმნება.
„შემიძლია გითხრათ, რომ ამ ამბის გარკვეულმა ინტერპრეტაციებმა გარკვეულწილად დააჩქარა ფრაქციების შექმნა, რადგან ჩვენ არსად ვჩქარობთ. ვფიქრობ, წლის ბოლომდე ფრაქციები შექმნილი იქნება. მართლაც, უკეთესია კოორდინაციისა და იმისათვის, რომ თითოეული დეპუტატის ჩართულობა გადაწყვეტილებების მიღებაში, საკანონმდებლო ინიციატივებში და აზრის ფორმირებაში იყოს უზრუნველყოფილი. ამიტომ ორი ახალი ფრაქცია ეყოლება უმრავლესობას. შესაბამისად, ნაცვლად 6 ფრაქციისა, ჩვენ გვეყოლება 8 ფრაქცია. თქვენ ნახეთ, რომ უკანასკნელი დღეების განმავლობაში აბსოლუტურად უსაფუძვლო სპეკულაციები მოჰყვა ჩვენს მიერ ამ ამბის გახმოვანებას. კიდევ ერთხელ ვამბობ, რომ ჩვენ რამდენიმე თვის წინ დავიწყეთ ამაზე მსჯელობა. როცა პარლამენტში 110-კაციანი ფრაქცია იყო და ის ჩაიშალა პატარა ფრაქციებად, მაშინვე ვთქვით, რომ არ იყო გამორიცხული შექმნილიყო კიდევ რამდენიმე ფრაქცია. სწორედ ამის გაგრძელებაა ესეც, სწორი და უკეთესი მენეჯმენტისთვის“, - განაცხადა მდინარაძემ.