ქუთაისში მდინარე „ოღასკურას“ კალაპოტი იწმინდება
ქუთაისში, ავტოქარხნის დასახლებაში მდინარე „ოღასკურის“ გაწმენდითი სამუშაოები მიმდინარეობს. მდინარე „ოღასკურა“ უხვი ნალექის დროს დიდდებოდა და კალაპოტიდან გადმოდიოდა, რაც ადგილობრივ მოსახლეობას პრობლემას უქმნიდა. მდინარემ ადგილობრივ მოსახლეობას პრობლემები წელსაც შეუქმნა.
ქუთაისის მერის, გიორგი ჭიღვარიას განცხადებით, კალაპოტის წმენდა ადგილობრივი ძალებით ხორციელდება, თუმცა, იგეგმება სრული წმენდა, რისთვისაც პროექტი მზადდება და მდინარის მთელი კალაპოტი გაიწმინდება.
„რამდენიმე თვის წინ, მდინარე ოღასკურამ ადიდების შედეგად ადგილობრივ მოსახლეობას სერიოზული ზარალი მიაყენა. ჩვენ აქტიურად ვმუშაობთ იმისთვის, რომ მსგავსი ფაქტი აღარ განმეორდეს. საჭიროა მდინარის კალაპოტის სრული წმენდა, რისთვისაც პროექტი მზადდება და კალაპოტის სრული გაწმენდის შემდეგ ადიდებული ოღასკურა მოსახლეობას პრობლემებს აღარ შეუქმნის", - აღნიშნა ქუთაისის მერმა გიორგი ჭიღვარიამ.
გაწმენდით სამუშაოებს ქუთაისის ააიპ „სპეციალური სერვისები“ აწარმოებს.
