„საქართველოს ბანკის“ ვარკეთილის ერთ-ერთი ფილიალიდან, რომელიც დღეს დილით დააყაჩაღეს, უმნიშვნელო თანხაა წაღებული, - ამის შესახებ „ინტერპრესნიუსს“ „საქართველოს ბანკის“ საზოგადოებასთან ურთიერთობის სამსახურის უფროსმა სოფო ბალავაძემ განუცხადა. როგორც მან აღნიშნა, ინციდენტის შედეგად არავინ დაშავებულა.

გარდა ამისა, გუშინ, წერეთლის გამზირზე, „საქართველოს ბანკის“ ერთ-ერთი ფილიალი დააყაჩაღეს, საიდანაც სოფო ბალავაძის ინფორმაციით, თანხა არ არის წაღებული.

„გუშინ საღამოს მომხდარი შემთხვევა უკვე გახსნილია და დამნაშავე უკვე დაკავებულია. მან თანხის წაღება ვერ მოახერხა. რაც შეეხება დღეს დილას მომხდარ შემთხვევას, მიმდინარეობს ძიება. ამ თავდასხმის დროს არავინ დაშავებულა. წაღებული თანხა აბსოლუტურად უმნიშვნელოა“, - განაცხადა სოფო ბალავაძემ.

„საქართველოს ბანკის“ ვარკეთილის ერთ-ერთი ფილიალი დღეს დილით დააყაჩაღეს. ორი ბოროტმოქმედი ბანკში იმ დროს შეიჭრა, როდესაც შენობაში რამდენიმე თანამშრომელი იმყოფებოდა.