პატრიარქი - წმინდა ნიკოლოზი არის სწრაფშემწე, ეხმარება ყოველ ადამიანს, რომელიც რწმენით და სიყვარულით მიმართავს მას

წმინდა ნიკოლოზი ყოველ ადამიანს ეხმარება, რომელიც რწმენითა და სიყვარულით მიმართავს მას, - ამის შესახებ სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დღეს ყოვლადწმინდა სამების საკათედრო ტაძარში სადღესასწაულო წირვის დასრულების შემდეგ ქადაგებისას ბრძანა.

უწმინდესმა ტაძარში შეკრებილებს სრულიად საქართველოს ნიკოლოზობის დღესასწაული მიულოცა და წმინდა მღვდელმთავრის შესახებ ისაუბრა.

„ყველას გილოცავთ ამ დიდებულ დღესასწაულს, ნიკოლოზობას. წმინდა ნიკოლოზი არის სწრაფშემწე, ეხმარება ყოველ ადამიანს, რომელიც რწმენით და სიყვარულით მიმართავს მას დახმარებისთვის. არ შეიძლება რომ არ დაეხმაროს. წმინდა ნიკოლოზი არაქრისტიანებსაც ეხმარება. ღმერთმა ინებოს, რომ ჩვენი განსაცდელი, მწუხარება, რომელიც არის რომელიმე ოჯახში სიხარულით შეიცვალოს წმინდა ნიკოლოზის ლოცვით. დალოცვილი და გახარებული იყავით“, - ბრძანა უწმინდესმა.

წმინდა ნიკოლოზი საქართველოს ეკლესიის მფარველად ითვლება, მას პატრიარქმა საქართველოს მართლმადიდებელი ეკლესია შეავედრა.

მართლმადიდებელი ეკლესია წმინდა ნიკოლოზის ხსენებას წელიწადში ორჯერ აღნიშნავს: 19 დეკემბერს, მისი გარდაცვალების დღეს და 22 მაისს, როცა მისი წმინდა ნაწილები მირონიდან ბარში გადაასვენეს.