სოფელ ჯოყოლოში აიუფ ბორჩაშვილის გათავისუფლების მოთხოვნით აქცია მიმდინარეობს

პანკისის ხეობის სოფელ ჯოყოლოში აქცია მიმდინარეობს. ტერორიზმის ხელშეწყობის ბრალდებით დაკავებული აიუფ ბორჩაშვილის ოჯახი, ნათესავები და მეგობრები ბორჩაშვილის პატიმრობიდან გათავისუფლებას მოითხოვენ. აქციის მონაწილეები მიიჩნევენ, რომ აიუფ ბორჩაშვილი უდანაშაულოა და შესაბამის უწყებებს მიმართავენ, საქმის ხელახლა გადახედვა მოხდეს.

აქციაზე იმყოფება აიუფ ბორჩაშვილის დედა, მარიამ ბორჩაშვილი. იგი "ინტერესნიუსთან" საუბარში აცხადებს, რომ მის შვილს ხეობიდან ახალგაზრდების სირიაში წაყვანაში არანაირი ბრალი არ მიუძღვის და მხოლოდ თარხან ბათირაშვილთან მეგობრობის გამო, ის ციხეში არ უნდა იყოს.

აღსანიშნავია, რომ აიუფ ბორჩაშვილი სამართალდამცველებმა 2015 წლის ივნისში ტერორიზმის ხელშეწყობის ბრალდებით დააკავეს. აიუფ ბორჩაშვილს სასამართლომ 14 წლით პატიმრობა შეუფარდა.