ტექნოპარკმა აშშ-ის წამყვანი უნივერსიტეტების სტუდენტებს უმასპინძლა

ეკონომიკის სამინისტროს ინოვაციებისა და ტექნოლოგიების სააგენტოს ამერიკის შეერთებული შტატების წამყვანი უნივერსიტეტების სტუდენტთა ჯგუფი ესტუმრა, რომელსაც სააგენტოს თავმჯდომარემ გიორგი ზვიადაძემ უმასპინძლა.

როგორც „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს, 10 წარმატებული ახალგაზრდა მსოფლიოს რვა ქვეყნიდან, მათ შორის - აშშ-დან, ავსტრიიდან, იაპონიიდან და სამხრეთ კორეიდან, საქართველოს, როგორც ევროპისა და აზიის დამაკავშირებელი ქვეყნის როლსა და გეოპოლიტიკურ პოტენციალს ეცნობა.

ASIA LEADERSHIP-ის პრეზიდენტმა სამუელ ჰუნგსო კიმმა იმედი გამოთქვა, რომ თბილისის ტექნოპარკი გააგრძელებს აღებულ გეზს და ამ სივრცეში ბევრი ახალი სტარტაპი დაიბადება.

,,ჩვენთვის დიდი პატივია ტექნოპარკში სტუმრობა. განსაკუთრებით საინტერესოა მთავრობის ინიციატივები მეწარმეობისა და ინოვაციების მიმართულებით. საქართველოს მოსახლეობა 3,7 მილიონია, ბაზარი პატარაა და სწორედ ამიტომ, როდესაც იწყებთ ახალი პროექტის განხორციელებას, უნდა იფიქროთ გლობალურად. ნამდვილად დასაფასებელი და აღსანიშნავია თქვენი წარმატებული მაგალითები. იმედი მაქვს, თბილისის ტექნოპარკი გააგრძელებს აღებულ გეზს და ამ სივრცეში ბევრი ახალი სტარტაპი დაიბადება, ახალგაზრდების მოზიდვითა და მათი ნათელი იდეების განსახორციელებლად. იმედი მაქვს, კიდევ ბევრ წარმატებულ ისტორიას შექმნით და საქართველო გახდება ცენტრი, რომელიც მოიზიდავს ახალგაზრდებს მთელი რეგიონის მასშტაბით”, - აღნიშნა შეხვედრაზე ASIA LEADERSHIP-ის პრეზიდენტმა სამუელ ჰუნგსო კიმმა.

ახალგაზრდა ლიდერები, ძირითადად, ჰარვარდის კენედის სკოლიდან, სტენფორდის უნივერსიტეტიდან და ფლეტჩერის სამართლისა და დიპლომატიის სკოლიდან არიან. სტუმრებს შორის იყო ქართველი სტუდენტიც, რომელიც ამჟამად ტაფტის უნივერსიტეტში სწავლობს. გიორგი ზვიადაძემ შეხვედრის მონაწილეებს ეკონომიკის სამინისტროს ინოვაციებისა და ტექნოლოგიების სააგენტოს შექმნის ისტორია გააცნო და სამომავლო თანამშრომლობის პერსპექტივებზე ესაუბრა.

ტექნოპარკში საინფორმაციო ტურის შემდეგ, სტუდენტები ინოვაციებისა და ტექნოლოგიების სააგენტოს მიმდინარე პროექტებს გაეცნენ და დეტალური ინფორმაცია მიიღეს ფაბლაბის შესახებ.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს