ახლობლების განცხადებით, ხელვაჩაურის მკვიდრის, 17 წლის მოსწავლის ინტერნეტ თამაშებში აქტიურობასთან დაკავშირებით ოჯახმა სკოლიდან შეიტყო
ხელვაჩაურში, 17 წლის სკოლის მოსწავლის თვითდაზიანებასთან დაკავშირებით, მოზარდის ბიძა აცხადებს, რომ მოსწავლეს ხელზე დაზიანებები გაზაფხულზე სკოლაში შენიშნეს და საქმის შესწავლაში პოლიციასთან ერთად ფსიქოლოგებიც ჩაერთნენ. მოზარდის ბიძა აცხადებს, რომ ბავშვი ინტერნეტ თამშებში აქტიურობასთან დაკავშირებით ოჯახმა სკოლიდან შეიტყო.
"გაზაფხულზე მისმა მასწავლებელმა დამირეკა და მითხრა, რომ მოსწავლეს ხელზე დაზიანებები აღენიშებოდა. სასწრაფოდ ხელვაჩაურის პირველ საჯარო სკოლაში მივედი, სადაც განათლების სამინისტროდან, ასევე რესურსცენტრიდან იმყოფებოდნენ. საქმეში პოლიციაც ჩაერთო. პოლიციაში გუშინ გვითხრეს, რომ ბავშვი აღნიშნულ თამაშში არ არის რეგისტრირებული. პოლიციაში შეტყობინების შემდეგ სკოლას ცოტა ხნით თავი დაანება. ჩვეულებრივი მოსწავლე იყო სკოლაში. ინტერნეტ თამაშების ჩართვის შესახებ სკოლიდან შევიტყვეთ ",- აცხადებს ბიძა.
ხელვაჩაურში არასრულწლოვანმა, სავარაუდოდ, სანადირო თოფით თვითდაზიანებები მიიყენა. 17 წლის ბიჭს სახის არეში უმძიმესი დაზიანებები აქვს მიყენებული. ის ხელვაჩაურში კლინიკა "მედინაშია" მოთავსებული.
