გაერო-ს გენერალურმა ასამბლეამ ხმათა უმრავლესობით რეზოლუცია მიიღო, რომელიც გმობს ყირიმში ადამიანის უფლებების დარღვევას და ყირიმის ნახევარკუნძულზე რუსეთის კანონებისა და იურისდიქციის არაკანონიერ დაწესებას.

აღსანიშნავია, რომ დოკუმენტში რუსეთი მოხსენიებულია, როგორც ოკუპანტი ქვეყანა.

ტექსტს, რომელიც უკრაინისა და კიდევ 30 ქვეყნის ინიციატივით იყო შეტანილი, 70-მა სახელმწიფომ დაუჭირა მხარი, მათ შორის ევროკავშირის ქვეყნებმა და აშშ-მ. წინააღმდეგ 26 ქვეყანა წავიდა, მათ შორის, რუსეთი, სომხეთი და ბელარუსი.

მიღებულ რეზოლუციაში დაგმობილია რუსეთის ფედერაციის მიერ ყირიმისა და სევასტოპოლის ოკუპაცია და ასევე აღნიშნულია უკრაინის ძალისხმევა ბოლო მოუღოს რუსეთის მიერ ყირიმის ოკუპაციას.