აფხაზეთისა და ცხინვალის რეგიონებიდან ბოლო 4 წლის განმავლობაში ჯანდაცვის რეფერალური პროგრამით მოსარგებლეთა რიცხვი 6-ჯერ გაიზარდა, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრობის კანდიდატმა ქეთევან ციხელაშვილმა კომიტეტების გაერთიანებულ სხდომაზე სიტყვით გამოსვლისას განაცხადა.
მისივე განმარტებით, არსებული ხელოვნური დაბრკოლებების მიუხედავად, ბოლო წლებში, გამყოფი ხაზების გასწვრივ მცხოვრებ მოსახლეობას შორის კონტაქტები და მიმოსვლა საგრძნობლად გაიზარდა.
ქეთევან ციხელაშვილის განცხადებით, მომავალში კიდევ უფრო მეტი გაკეთდება, რომ ახალი ინიციატივების განხორციელებას უფრო მზარდი დინამიკა ჰქონდეს.
„ჩვენი შერიგებისა და ჩართულობის პოლიტიკით, ფაქტობრივად ვუპირისპირდებით დაყოფისა და დაშორიშორების ძალიან ხისტ პოლიტიკას, რომელიც გამყარებულია ტანკებით, მავთულხლართებით, სამხედრო სიმძლავრეებით, ადამიანის უფლებების დარღვევის უხეში და მანკიერი პრაქტიკით, პროპაგანდითა და მტრის ხატით. ჩვენი პასუხი ამ ყველაფერზე არის ძალიან ცალსახა - რაც უფრო მაღალია დაბრკოლებები, მით უფრო მეტი სამშვიდობო ძალისხმევა იქნება მიმართული მათ დასძლევად“, - განაცხადა ქეთევან ციხელაშვილმა.