სადაც სამართალდამცველების გადაცდომა იქნება დადასტურებული სასამართლოს მხრიდან, ჩვენი მხრიდან უმკაცრესი ზომები გატარდება, - ამის შესახებ შს მინისტრობის კანდიდატმა გიორგი გახარიამ ”ბირჟა მაფიის” წევრების საქმეზე ”ევროპული საქართველოს” წევრის, ელენე ხოშტარიას კითხვის საპასუხოდ განაცხადა.
”ბირჟა მაფიის” საქმეზე გადაწყვეტილება დევნის შეწყვეტაზე მიიღო პროკურატურამ. შესაბამისად, ბალანსის მომენტი მუშაობს. სტანდარტი სულ სხვაა სასამართლოში და პროკურატურაში. როდესაც საგამოძიებო კომპონენტი ვერ უძლებს სტანდარტს, მაშინ ხდება მახინჯი რეციდივები, სადაც ეს იქნება ფაქტობრივად დადასტურებული სასამართლოს მხრიდან, ჩვენი მხრიდანაც უმკაცრესი ზომები იქნება გატარებული. არასამართლიანად და უკანონოდ ხელს არავის დავაფარებთ. ბოლო სამი კვირის განმავლობაში ჩემი დროის 50% იყო დათმობილი პოლიციელების დაცვაზე. ერთი შემთხვევა მოხდა, როდესაც პოლიციელს თავი გაუტეხეს, მეორე შემთხვევაში, პოლიციელისთვის რაიმეს დაბრალება გახდა ინსტრუმენტი კანონის დარღვევის შემთხვევაში რაღაც ალიბების შეთხზვის. რაღაც ბალანსი გაგვექცა, სადღაც გატყდა სიტუაცია. უნდა შევთანხმდეთ, რომ ყველანაირი პოლიტიკური პოზიციის გათვალისწინების გარეშე, საზოგადოების უსაფრთხოება არის თითოეული ჩვენგანის ინტერესი”, - განაცხადა გახარიამ.