მთავრობა, რომელიც დღეს სრული სერიოზულობით გვიმტკიცებს, რომ ქვეყანაში ყველაფერი კარგადაა და არაფრის გამოსწორება არ არის საჭირო, ჩვენს მხარდაჭერას ვერ მიიღებს, - ამის შესახებ ჟურნალისტებს საპარლამენტო უმცირესობის ლიდერმა დავით ბაქრაძემ განუცხადა.
ბაქრაძის შეფასებით, საქართველოს მთავრობა აცდენილია იმ რთულ რეალობას, რომელშიც ქვეყნის მოსახლეობა ცხოვრობს.
„დღეს საზოგადოებამ კიდევ ერთხელ იხილა მთავრობა, რომელიც მთლიანად დაკავებულია თვითკმაყოფილებით. ეს არის მთავრობა, რომელმაც ვერც ერთ მნიშვნელოვან კითხვას პასუხი ვერ გასცა, მთავრობა, რომელიც გვიმტკიცებს, რომ გაზის, ელექტროენერგიის გაძვირება, ფასების ზრდა, პენსიის არ გაზრდა - ეს არაფერს ნიშნავს და მოსახლეობას, ვისაც ეს აწუხებს, არანაირი დახმარება არ სჭირდება, ბუნებრივია, ასეთ პირობებში ჩვენ ამ მთავრობას მხარს ვერ დავუჭერთ“, - განუცხადა ჟურნალისტებს დავით ბაქრაძემ.
ამ წუთებში პრემიერ-მინისტრს და მთავრობის განახლებულ შემადგენლობაში წარდგენილ მინისტრებს საპარლამენტო უმცირესობის ფორმატში უსმენენ.