გია გაჩეჩილაძის სიძე, ბიზნესმენი გიორგი შარაშიძე ე.წ. ტენდერების საქმეში პოლიტიკურ სპეკულაციებს ხედავს, - აღნიშნულის შესახებ შარაშიძემ სპეციალურად გამართულ პრესკონფერენციაზე განაცხადა.

მან კიდევ ერთხელ მოუწოდა სახელისუფლებო გუნდის წარმომადგენლებს, თავი შეიკაონ საქმის შეფასებისგან მანამ, სანამ კონკურენციის სააგენტო და სასამართლო საქმეს სრულფასოვნად არ შეისწავლიან და შესაბამისი გადაწყვეტილება არ გამოცხადდება. ბიზნესმენი იმედოვნებს, რომ უკვე გაკეთებული განცხადებები გავლენას არ იქონიებს საქმის წარმოებაზე და აცხადებს, რომ მნიშვნელოვანია საქმე მაქსიმალურად იყოს გამჭვირვალე და მედიისთვის ღია.

”პირველივე დღიდან პრემიერ-მინისტრის გადაყენებასთან დაკავშირებით ფსონი იმხელა იყო, რომ ალბათ აქვს ადგილი პოლიტიკურ სპეკულაციას. იმედი და დიდი სურვილი მაქვს, რომ გაკეთებული განცხადებები არ იქონიებს გავლენას კონკურენციის სააგენტოზე ან სასამართლოზე. ეს პროცესი იქნება გამჭვირვალე და მოხდება მისი მაქსიმალურად გაშუქება”, - განაცხადა გიორგი შარაშიძემ.