სპეცოპერაცია, რომელიც ჩატარდა თბილისში, ნამდვილად იყო განეიტრალება გაცილებით უფრო დიდი საფრთხის, - ამის შესახებ პრემიერ-მინისტრობის კანდიდატმა გიორგი კვირიკაშვილმა ფრაქცია „ნაციონალური მოძრაობის“ სხდომაზე ბერი სალოსის გამზირზე ჩატარებული სპეცოპერაციის შესახებ დასმული კითხვის საპასუხოდ განაცხადა.
„რამდენადაც ცნობილია, პროკურატურამ მიიღო გადაწყვეტილება ჩატაევის საკითხზე იმიტომ, რომ იქ არ იყო საკმარისი სამხილები იმისთვის, რომ პატიმრობა გაგრძელებულიყო. რაც შეეხება იმას, თუ როგორ მოხვდა ის საქართველოს ტერიტორიაზე, ამას გამოძიება აუცილებლად დაადგენს და აუცილებლად იქნება სახელმწიფოს რეაგირება ამის თაობაზე“, - განაცხადა კვირიკაშვილმა.
რაც შეეხება იმას, რომ კრიმინოგენული ვითარება არის გაუარესებული და ქალაქის ცენტრში ხდება დაყაჩაღება, გიორგი კვირიკაშვილის განცხადებით, ასეთი ყოველთვის ხდებოდა და დღესაც ხდება.
„ყველა დანაშაული შუქდება და ეს არის მხოლოდ და მხოლოდ მიღწევა ჩვენი ხელისუფლების, რომ აღარ იჩქმალება ასეთი ფაქტები, მაგრამ ძალისხმევა, რომ გასაძლიერებელია ამ მიმართულებით, ფაქტია“, - განაცხადა კვირიკაშვილმა.