გიორგი კვირიკაშვილი - გარემოს დაცვა არა მხოლოდ დარჩება ჩვენს პრიორიტეტად, ამ მიმართულების წონა სულ უფრო და უფრო გაიზრდება

გარემოს დაცვა არა მხოლოდ დარჩება ჩვენს პრიორიტეტად, ამ მიმართულების წონა სულ უფრო და უფრო გაიზრდება ჩვენი პოლიტიკური კალათის შემადგენლობაში, - ამის შესახებ პრემიერ-მინისტრობისკანდიდატმა გიორგი კვირიკაშვილმა საპარლამენტო უმრავლესობის სხდომაზე განაცხადა, სადაც მან სამთავრობო პროგრამა წარადგინა.

„გარემოს დაცვის კუთხით მინდა გამოვეხმაურო ჩვენი პარლამენტის წევრების შეშფოთებებს, წუხილებს. მინდა ამ ტრიბუნიდან კიდევ ერთხელ დაგიდასტროთ, რომ გარემოს დაცვა არა მხოლოდ დარჩება ჩვენს პრიორიტეტად, ამ მიმართულების წონა სულ უფრო და უფრო გაიზრდება ჩვენი პოლიტიკური კალათის შემადგენლობაში. აქ არაფერ შუაშია სამინისტროების შერწყმა, ეს არის პოლიტიკური გადაწყვეტილება და ეს სიტყვები, რომ ლიტონი არ არის, თქვენ ამაში მომავალში კიდევ უფრო დარწმუნდებით. არც ერთი ფუნქციონალური მიმართულება არა მხოლოდ არ შეიკვეცება, არამედ გაძლიერდება და მომავალ წლებთან ერთად დაფინანსებაც ამ სამინისტროსი გაიზრდება გარემოს დაცვის კუთხით. ეს არის უმნიშვნელოვანესი გზავნილი, რომელსაც ჩვენ ყველას ვეუბნებით, ვინც ამ საკითხზე გამოთქვა შეშფოთება თუ წუხული“, - განაცხადა კვირიკაშვილმა.