დაიწყეს ჩემი გაშიშვლება, ალბათ, შეშინება უნდოდათ, - ამის შესახებ ნარკოდანაშაულში ბრალდებულმა მსახიობმა გიორგი გიორგანაშვილმა სასამართლოში, დასკვნითი სიტყვის წარმოთქმისას განაცხადა.

გიორგანაშვილმა დეტალურად გაიხსენა მისი დაკავების დეტალები და აღნიშნა, რომ ადგილი ჰქონდა დაკავების დროს სიტყვიერ და ფსიქოლოგიურ ზეწოლას.

“როდესაც სარფიდან შემოვედი, ტაქსი გავაჩერე და თბილისში ჩამოვედი. გზაში ჩამეძინა და რომ გავიღვიძე, პოლიციელები იყვნენ ჩემს გარშემო. ისინი მთხოვდნენ ჩემი ბიზნეს პარტნიორის წინააღმდეგ ჩვენების მიცემას. ამის შემდეგ დაიწყეს ჩემი გაშიშვლება, ალბათ, შეშინება უნდოდათ. 10 წუთი ასე ვიდექი და დამცინოდნენ. რეალურად, დამამცირეს. მერე სამმართველოში წამიყვანეს და „მამუშავებდნენ“. იქაც ვთქვი, რომ ადვოკატი მინდოდა", - განაცხადა გიორგანაშვილმა.